സ്വപ്നം

അടുത്ത ജന്മം ന്റെ സ്വപ്നങ്ങള്‍
കണക്കെ വർണ്ണത്തൂവലുകൾ
ഉള്ള ഒരു പക്ഷിയാകണം
നിസീമമായ വിഹായസ്സിൽ
ചിറകടിച്ചു പറക്കണം
ഒരു മരച്ചില്ലയിലും ചേക്കേറാതെ...
എന്റെ ചിറകുകളെ ആലിംഗനം
ചെയ്യുന്ന കാറ്റിനെ പ്രണയിക്കണം
ഒഴുകി നടക്കുന്ന മേഘപാളികളോട്
കിന്നാരം പറയണം
നിലാവിന്റെ പെയ്ത്തിൽ
നനഞ്ഞു കുതിരണം
അടർന്നു വീഴുന്ന നക്ഷത്ര കണികകൾ
തൂവലുകളിൽ ഒളിപ്പിക്കണം
സൂര്യന്റെ കനല്‍ ഒരൽപം കടം വാങ്ങണം
ഒടുവിൽ ചിറകു കുഴയുമ്പോൾ
ആ കനലിൽ സ്വയം എരിഞ്ഞു
ചാരമായി കാറ്റിൽ അലിയണം!!!